Shine 100 cc finally market me launch ho chuki h. Honda apna new engine PGMFi technology ke sath laya h. Sath hi Shine brand ka use kia h. Shine ka nam sunte hi ek bharose wali feeling aa jati h, itne salo se hum Shine 125 to use kar hi rahe h to aiye dekhte h ki Shine 100cc bhi humari umeed par khari utregi ya nahi?
Sabse pehle jaan lete h ki isme hume kya kuch mil jata h, shuru karte h iski design se.
Shine 100cc – Design
Shine 100 cc ki design boht kuch Shine 125 se hi inspired hai. Dikhne me apko dur se ye Shine 125 jesi hi lagne wali h. Shuruat karte h iske front design se, age ki side apko mil jata h normal halogen head lamps, jisko complement karne ke lie die gye h indicators jo ki orange color me. Raat me kafi achi tarah se kaam karte h ye. Body ki bat kare to ye bike kafi light weight rakhi gyi h sirf 99 kg ke kerb weight ke sath ati h Shine 100.
Sath hi Shine 100cc me Honda ne ek new Diamond cut chassis bhi introduce kia h jo ki is light weight body ko complement kar sake. But to be honest mujhe personally thoda sa wobble feel hua front tyre me jab humne isko thoda kharab raste par test kia. I prefer ki age ki side thoda weight aur add hota to itni wobbling shayad nhi hoti. Iske bare me detail me niche riding performance section me bat karte h.
Shine 100 me apko Shine 125 ka similar graphic theme dekhne ko milega. Sath hi all black alloy wheels jo ki bike ko aur achi appeal dete h. Shine 100 apko 5 color options me milegi. Jisme base color to black hi rehne wala h but jo graphical stripes hai wo 5 options me milti hai. Black with Blue, Black with Green, Black with Gold, Black with Red and Black with Grey.
Shine 100cc – Tyres, Suspensions, Brakes
Shine 100 me apko front me 2.75 – 17 41P tyre milega. Rear side me apko 3.00 – 17 50P ka tyre milega. Ye dono hi tyres tube wale hai. Yaha par tubeless tyres ka option nhi milega apko. Agar apko tubeless tyres chahie to apko after market bahar se hi lagwana padenge.
Brakes ki bat kare to apko front me 130 mm aur rear me 110mm ke drum brakes milenge. Isme apko disc brake ka option nhi milega, khair is bike me disc brakes ki kuch khas jarurat bhi nhi h. But ha brakes me bhi yaha par apko CBS yani ki combi-braking system milta h. Yani ki agar ap rear brake lagayenge to 60-65% rear brake lagega aur baki ka front brake automatically engage ho jaega. Is se apki bike ke skid hone ke chances kam ho jaenge aur emergencies me jaldi se apki bike ruk payegi.
Suspensions ki bat kare to front me apko Telescopic suspensions dekhne ko milenge jo ki kafi decent perform karte h. But rear side me apko good old twin suspensions milenge. Are wo hi apne spring wale suspensions. But usme bhi apko adjustment ka option nhi milega ap usko jesa hai wese hi use kar paenge.
Shine 100cc – Body Dimensions
Shine ke body dimensions apko niche ki table me easily dikh jaenge.
Shine 100cc – Tank Size & Mileage
Shine 100 me apko 9L ka fuel tank milta h. Fuel tank ki design kafi sleek rakhi gayi h. Jo ki seat ko kafi ache se complement karta h. Mileage ki agar bat kare to company kuch mileage claim to nahi karti h, but Honda ka kehna hai ki ye best in class mileage degi. Baki Honda ka mileage leaderboard to apko har dealership par mil hi jaega. Jaha ap khud jaiye khud se test kijie apko jo mileage milega uske bad decide kijie.
But as far as I think in my opinion ye apko 75-90 KmpL de degi.
Shine 100cc – Engine
Shine 100 cc me sabse khas cheez hai Honda ka all new refined air cooled Engine. Isme apko 4 Stroke SI Engine dekhne ko milega jo ki 98.98 cc k displacement wala h. Ye engine apko max 5.43 kW ka output de sakta h 7500 rpm par. Shine 100 ka engine generate kar sakta h 8.05 Nm ka Torque 5000 rpm par. Isme sabse khas hai iska Fuel system. All new PGMFI technology ke sath. Ab ye kya h samjhata hu.
PGM-FI ka matlab hai Programmed Fuel Injection, jo ki sensors ko use kar ke constantly fuel aur air ka mixture insert karta h engine me. Taki apko consistent power output mil sake. Sath hi bharpoor fuel efficiency yani ki mileage. Aur sabse badhia baat ye engine eco-friendly bhi hai environment ko bhi kam nuksan pohchata h. As a nature lover ye bat ne mujhe kafi impress kia.
Shine 100cc – Comfort and Features
Shine 100cc har height ke rider ke lie ek comfortable ride rehne wali h. Apki height 5′ ho ya 6′ apko Shine 100 chalane me koi problem nahi ane wali. Sirf aur Sirf 786mm ki seat height rakhi gyi h jo ki short riders ke lie kafi comfortable height hai. Long riders ko bhi dikkat islie nhi hone wali h kyuki iska fuel tank placement kafi acha h. Jisse ki apko narrow leg opening angle aur shandaar knee grip milegi.
Iski lambi si 677mm ki seat par apko pillion ke sath me bhi kafi space mil jaegi. To nikal jao apni new Shine 100 le kar lambi rides par. Kyuki iski seat jitni lambi h utni ki comfortable bhi, not too soft not too hard. Ab chahe apko family ke sath kahi jana ho ya fir koi saman le kar jana ho. Har tarah ki ride ap Shine 100 ke sath kar sakenge. Iski handle reach bhi sahi hai, apko na age jhukna padega na hi piche lean hona padega.
Features ki bat kare to sabhi basic features ke sath apko isme ek special feature bhi dekhne ko milega. Jo ki h side stand engine inhibition ka. Ab ye kya cheez h? Tension na lo abhi samjhata hu. Agar apka side stand laga hua h aur ap Shine 100 start karte h. To apki gadi start to ho jaegi lekin jese hi ap gear lagayenge gadi apne ap band ho jaegi. Kafi kamal ka security feature h ye side stand ki wajah se boht si bar turn lete time bike disbalance ho jati h. To ab ye tension lene ki apko jarurat hi nahi.
Shine 100cc – Ride Impressions
Comfort –
Meri height almost 6 ft hai, To me apne point of view ke hisab se apko samjhata hu. Mere lie bike kafi comfortable thi. Seat height 786 mm rakhi gayi h jo ki mere lie to comfortable hai hi but agar koi short rider bhi hai to usko bhi problem nhi degi. Handle reach bhi kafi achi rakhi gyi h. Seat ki cushioning bhi kafi achi h not too hard and not too soft. Mene pillion ke sath bhi isko ride kar ke try kia to koi dikkat as such mujhe nahi feel hui.
Ride Quality –
Ride quality ki bat kare to ek decent ride quality ap is bike se expect kar sakte h. Ye mere opinion me 100cc ke hisab se theek thak ride quality provide kar deti h. Mene pehle ise normal city roads me try kia wha koi problem mujhe feel nahi hui. Almost 60 kmph ki speed tak me isko le kar gaya waha araam se gaya. Uske bad vibrations feel hue jo ki is displacement wale engine ke lie expected hi h.
Fir hum isko le kar gye thode kharab raste par, waha mujhe thodi dikkat feel hui. Kyuki bike ko boht light weight banaya gaya h us wajah se age ki side weight kam h. To jab hum thode kharab raste par hote h to iska handle wobble karne lagta h, which is a problem. Kyuki ye bike mainly rural areas ke log hi lenge gav me itni proper roads hoti nhi h. To jab bhi thoda kharab road hoga apko isko dheere dheere hi waha se nikalna hogi.
Ergonomics –
Ergonomics ki bat kare to me isko better side pe points dunga. Sare buttons meri reach me the. Right hand side me apko engine start ke lie switch milta h. Left me apko indicators, horn aur high/low beam ke lie switches milte h. Pass light ke lie yaha par apko alag se switch nhi milta h which I wish ki hona chahie tha. Clutch brake bhi ample distance par placed h, easy to reach hai. Gear shifting me bhi koi dikkat ni hone wali apko easy to reach hai wo bhi. Right leg se ap brakes engage kar sakte h aur jarurat padhne par kick bhi laga sakte h.
Shine 100cc – Pricing and Availability
Shine 100cc ki pricing rakhi gayi hai Rs 64,900(Ex-Showroom, Maharashtra). Jo ki kafi achi pricing hai is bike ke hisab se. Ab har city/state ke according RTO, Insurance etc charges alag hote h. To final pricing ke lie ap nearest Honda dealership se contact kar sakte h. Iski booking bhi start ho chuki hai to agar apka man hai isko lene ka to ap isko book karva sakte h.
